अछाममा भीम रावलको विकल्पका रूपमा हेरिएका झपट बोहरा नेकपा एमालेको खुला केन्द्रीय सदस्यमा निर्वाचित भएका छन्। सुदूरपश्चिम प्रदेशको पूर्व आर्थिक मामिला तथा योजना मन्त्रीसमेत रहेका बोहराले २०७९ को प्रतिनिधिसभा निर्वाचनमा पराजय भोग्नुपरे तापनि पार्टी संगठन र नेतृत्वको विश्वास जित्दै केन्द्रीय राजनीतिमा आफ्नो स्थान सुरक्षित गरेका हुन्।
तत्कालीन निर्वाचनमा भीम रावलको टिकट खोसेर उम्मेदवार बनेका कारण उनले पार्टीभित्रको आन्तरिक असन्तुष्टि र कार्यकर्ताको विरोधको सामना गर्नु परेको थियो।
२०२४ सालमा अछामको दर्नामा जन्मिएका बोहराको पृष्ठभूमि बैंकिङ क्षेत्रसँग जोडिएको छ। मालिका विकास बैंक र नेपाल बैंकर्स एशोसिएसनको नेतृत्व गरिसकेका उनी २०६३ सालपछि मात्र सक्रिय राजनीतिमा प्रवेश गरेका थिए।
सुरुमा माओवादी केन्द्रबाट राजनीतिक यात्रा थालेका उनले २०७४ मा प्रदेश सभा सदस्य जितेर मन्त्रीको जिम्मेवारी सम्हालेका थिए। नेकपाको विभाजनपछि माओवादी त्यागेर एमाले रोजेका बोहरा छोटो समयमै अध्यक्ष केपी शर्मा ओलीको विश्वासपात्र बन्न सफल भए।
प्रतिनिधिसभा निर्वाचनमा एकीकृत समाजवादीका शेरबहादुर कुँवरसँग पराजित भए पनि उनले पार्टीको काममा निरन्तरता दिए। माओवादी पृष्ठभूमिबाट आएर एमालेको मूल प्रवाहमा स्थापित हुनु र केन्द्रीय सदस्यमा निर्वाचित हुनुले उनको राजनीतिक कद बढेको पुष्टि गरेको छ।
अछामको राजनीतिमा भीम रावलको प्रभावलाई प्रतिस्थापन गर्न खोजिरहेका बोहराका लागि यो जितले थप ऊर्जा प्रदान गरेको छ।